كيف بدأت فكرة الماشين ليرننج او تعلم الالة

كيف بدأت فكرة ال machine learning ؟

———————————————————

احنا اتكلمنا عن البرمجة التقليدية و قولنا ان الحاجة ام الاختراع لذلك كان لازم يتغير الشكل التقليدى للبرمجة و الكومبيوتر يبدا يصمم البرنامج بتاعه بنفسه و سمينا ده machine learning

طيب تعالو بقى نشوف مع بعض ازاى بدأو يفكرو فى ده

الموضوع كان فعلا صعب لانهم عايزين ال machine تعلم نفسها بنفسهاو تفكر لوحدها عشان تلاقى حلول لمواقف فى احتمال انها تكون متعرضتش ليها قبل كده و الكائن الوحيد اليتميز بده فى مخلوقات ربنا كلهم هو الانسان… من الاخر حتة “الفهلوة” الموجودة عند البنى ادمين ….فبدأت الفكرة تمخمخ فى عقل ال data scientists فى انهم يحاولو ينقلو و لو حتى جزء من الذكاء البشرى للكومبيوتر وهو ما يطلق عليه artificial intelligence او باختصار AI

فى الواقع كان الموضوع فعلا تحدى انهم ازاى يخلو كائن غبى زى الكومبيوتر مش بس يفكر و خلاص ..لا ده كمان يفكر بطريقة بشرية ويبقى “واد فهلوى يفهمها وهى طايرة” بدل الوكسة الهو فيها بالبرمجة التقليدية وانه محتاج المبرمج التقليدى يشربه المعلومة بالمعلقة تاتة تاتة

المشكلة ان احنا كبشر طريقة تفكيرنا معقدة جدا

يبقى السؤال الاول العلماء سألوه لنفسهم ازاى البشر اصلا بتفكر و تتعلم لوحدها ؟؟

—————————————————————————–

تعالو نشوف المثال ده مع بعض

مثال:

——-
اسمحولى اديكم مثال عن المواصلات فى اسكندرية

انا هديك شوية معطيات وبعدها هسألك سؤال و هديك المعطيات دى فى مناطق سهلة فى اسكندرية و منتظر منك اجابة بس فكر كويس قبل ما تجاوب لان اجابتك هى الهتفهمك باقى الكلام

لو قولتلك انت دلوقتى فى محطة سيدى جابر فى اسكندرية و عايز تنزل محطة الرمل على سبيل المثال بعربيتك فتقريبا هتاخود وقت اد ايه ؟؟ مع العلم انك عايز تعمل المشوار اللذيذ ده 2 الظهر الهو اصلا ساعة الزحمة ؟؟؟ عايزك كمان تجاوب على نفس السؤال بس لو حضرتك بدأت تتحرك 7 الصبح ؟

فكر كويس و جاوب:

خلاص خلصت

لو انت فكرت صح هتقولى ان المشوار ده هياخود معاك من ساعة الا ربع لساعة فى حالة ان حضرتك اتحركت الساعة 2 الظهر و نفس المشوار هياخود 10 دقائق لو انت اتحركت 7 الصبح وده بسبب طبعا ان الظهر الشارع هيكون زحمة و الصبح هيكون فاضى

اجابة حضرتك دلوقتى هى ما يطلق عليه اسم prediction او بالعربى تنبوء خليك فاكرها عشان هنرجع للكلمة دى تانى

السؤال التانى العايزك تساله لنفسك انت ازاى عرفت المعلومة دى رغم انها معلومة مستقبلية فهل انت مثلا ساحر او بتضرب الودع عشان تعرف الاجابة على السؤال ده ؟!!

الاجابة:

——–

فى الواقع حضرتك استخدمت بشكل غير واعى منك المعطيات الانا عطيتهالك و هى

معطيات inputs:

—————–

1- منطقة التحرك :سيدى جابر

2-منطقة الوصول :محطة الرمل

3- التوقيت :الساعة 2 وقت الزحمة او 7 الصبح البيكون الشارع فاضى

علشان توصل لاستنتاج

الاستنتاج :

———-

الاستنتاج بتاعك هيكون ان تقريبا المشوار ده هيخود ساعة لو طلعت الساعة 2 …طيب ليه ساعة ؟!!….ليه مش 10 دقائق مثلا او ساعتين؟؟!!!…. هلاقيك بترود عليا ” لا هى مش هتاخود اكتر من كده و انت شبه متاكد “

السؤال بقى الباشا جاب الثقة دى كلها منين؟!!!!!!!!!! فكر قبل ما تقرى او تجاوب

الاجابة:

——–

لو انت جاوبت زى ما انا متوقع منك فاجابتك صح جدا انا عارف انك بتفكر فيها دلوقتى

اكيد اجابتك هتكون :

——————–

انك وصلت للاستنتاج ده بسبب “خبرتك”……(تحت كلمة خبرتك دى مليون خط يا كبير واستنانى بقى)

انت ممكن تكون قطعت المشوار ده اكتر من الف مرة و فى اوقات مختلفة كتير و ده كان متخزن فى مخك ك memory و ده عطاك خبرة فى تنبوء دقيق بمدة المشوار وهى دى الميزة الموجودة فى الذكاء البشرى هو قدرة الانسان فى تحويل ال memory ل experience يتعلم منها حاجة جديدة و ده الفرق الجوهرى بين الكومبيوتر والانسان لان حضرتك كل ما بيحصل احتكاك بينكو بين البيئة الحوليك بتتعلم حاجة جديدة من غير ما تحتاج ان حد يعلمهالك او يلقنهالك

اما بالنسبة للكومبيوتر فهو عنده memory فعلا زى الانسان و دى كمان اكبر وتقدر تشيل معلومات بشكل اسرع لكن الكومبيوتر لو نزلنا عليه القرأن الكريم مش هيبقى شيخ الازهر او هيربى دقنه لانه بالتاكيد لن يصبح فقيها فى امور الدين لكن هو مجرد دولاب انا شايل فيه المعلومات دون اى قدرات تحليلية او قدرة على اكتساب الخبرة

و هنا كان مربط الفرس الاتشعلق فيه العلماء….و قالو احنا عايزين نصمم بعض ال algorithms الممكن تحول ال memory الخاصة بالكومبيوتر ل experience و بكده يبقى الكومبيوتر هيبدا يفكر بشكل شبه بشرى عن طريق تحليله لل memory دى و الحصول على استنتاجات منها و هى الحاجة الاحنا سمنيها من شوية prediction او تنبوء

عشان افهمك الموضوع بشكل افضل تعالى نتخيل اننا فعليا نجحنا نعمل المثال الفات بتاع المواصلات بال MACHINE LEARNING يبقى ايه الخطوات الكومبيتور هيعملها علشان يفكر زى البشر ويكتسب خبرة ؟؟؟؟

الاجابة:

——-

اولا انا كمبرمج لازم اكون مقدم للكمومبيوتر معلومات عن ال TASK بتاعى عشان يبقى عنده ال memory الهيحولها بعد كده لخبرة يعنى مبعنى ادق اخليه يحتك بالبيئة كانه بالظبط راح عمل المشاوير دى كلها اكتر من مرة

وده من خلال FILES فيها معلومات عن :

1-منطقة التحرك

2-و منطقة الوصول

3-ساعة التحرك

3-و الوقت المتوقع للوصول

خود بالك انا لحد دلوقتى مكتبتش اى كود او برمجت انا بس حطيت كل المعلومات دى فى FILE زى ال EXCEL على سبيل المثال علشان انا اقراها او حتى الكوموبيوتر يقراها بدون منح الكومبيوتر خبرة حقيقية

الجزء السحرى هيبدا اول ما اطلب من ال كومبيوتر انه يستخدم ال ALGORITHMS الخاصة بال MACHINE LEARNING علشان يحاول يلاقى ” نمط” او علاقة بتربط بين ال INPUT و الOUTPUT والعددهم ممكن يكون بالالاف وده طبعا هيكون فى مصلحة الكومبيوتر لان كل ما المعلومات تزيد كل ما دقته و خبرته بعد كده تزيد اكتر

ازاى الكومبيوتر هيعرف يوصل للعلاقة دى مش موضوعنا دولقتى بس هو بكده فعلا قدر يلاقى علاقة تربط بين مكان التحرك و مكان الوصول و وقت التحرك ووقت الوصول و قدر يلاحظ ان فى خلال الساعة 2 لو انا اتحركت بالعربية فاحتمال ان اوصل فى خلال ساعة هيكون احتمال كبير ولو اتحركت 7 الصبح هوصل فى ما يقارب 10 دقائق

طيب هل انا كتبت كود قولت فيه للكومبيوتر انى لو اتحركت الساعة 2 فانت المفروض تقولى انى هوصل الساعة 3؟؟!! و لو اتحركت الساعة 7 فقولى انى هوصل 7:10 ?!!

ابدا على الاطلاق …انا كل العملته هو انى عطتله المعلومات وقولته اقراها و من خلال ال machine learning algorithm حاول توصل لوحدك لاستنتاج يربط بين المعلومات الانا عطيتهالك ك memory…وبكده هو الهيكتب بنفسه الكود اليربط بين ال input ال output

رغم انى مقولتش للكومبيوتر اى اجابة بشكل مباشر على الاطلاق ولا كتبت كود بيقول كده لكن الخبرة الاكتسبها الكومبيوترمن ال memory الموجودة جواه خليته يقدر يتنبا بموعد شبه تقريبى للوصول بناء على الوقت و المكان العربية هتتحرك منه و المكان المفروض العربية توصله

هو ده السحر الموجود فى ال MACHINE LEARNING هو انى اخلى الكومبيتور يصمم البرنامج بتاعه بنفسه و يلاقى علاقة تربط بين الINPUT و OUTPUT

و من هنا نقدر نقول ان تعريف ال machine learning بشكل عام:

——————————————————————-

هو قدرة الكومبيوتر على اكتساب خبرة و مهارات experience من خلال تحليل معلومات و data مخزنة داخل الكومبيوتر و`ذلك لايجاد علاقة او نمط تربط بين كل ال inputs و كل ال outputs